Nasikop sa kapulisan ang siyam (9) ka Korean nationals sa Cebu City tungod sa kaso nga illegal detention. Ang operasyon gihimo niadtong Setyembre 26, 2025 human makadawat og reklamo nga adunay empleyado nga gitanggong ug wala tagai og sweldo sulod sa duha ka bulan.
Base sa korte, ang kaso gi-file pa niadtong Agosto 8, 2025 ug ang warrant gi-isyu ni Judge James Stewart Ramon E. Himalaloan sa RTC Branch 7, Cebu City niadtong Setyembre 23. Ang uban sa mga akusado walay gi-rekomendar nga piyansa, samtang ang uban gitugotan nga makapiyansa og ₱120,000 matag usa.
Gipahibalo usab nga lima sa siyam ka nadakpan adunay Red Notice gikan sa INTERPOL sa ilang nasud. Dugang pa, niadtong Oktubre 2, 2025, gilukatan usab sila og laing reklamo kalabot sa illegal online gambling ubos sa PD 1602 ug RA 10175 o Cybercrime Prevention Act.
Karon, lima ka suspetsado gibutang sa RSPU-7 Custodial Facility ug ang upat naa sa Cebu City Custodial Facility samtang nagpadayon ang kaso. Gipanghimatuoran ni PBGEN Redrico A. Maranan nga dako ang papel sa katawhan sa kalampusan sa operasyon pinaagi sa ilang pagreport sa mga kahilangan nga kalihokan.
Source: PRO7- PIO
I via Renante Socia Lada