Nakadakop og 792 ka indibidwal nga nalambigit sa ilegal nga drogas ang Police Regional Office 7 (PRO7) human sa 696 ka operasyon nga gihimo sa tibuok Central Visayas niadtong Pebrero 2026. Sa maong mga operasyon, nakasakmit usab ang kapulisan og kapin sa ₱31 milyones nga kantidad sa gituohang shabu.
Sumala sa PRO7, mokabat sa 4,635.34 gramos nga gituohang shabu ang ilang nakompiskar nga adunay standard drug price nga ₱31,520,312. Ang mga suspek nadakpan pinaagi sa buy-bust operations, police response operations, checkpoint operations, ug pagpatuman sa warrants of arrest ug search warrants sa nagkadaiyang lugar sa rehiyon.
Matod pa ni PRO7 Regional Director Police Brigadier General Redrico A. Maranan, magpadayon ang kapulisan sa pagpalig-on sa ilang kampanya batok sa ilegal nga drogas sa Central Visayas.
Gipasabot ni Maranan nga dili nila tugotan nga magpadayon ang operasyon sa mga kriminal nga nalambigit sa drogas tungod kay makadaot kini sa kinabuhi sa mga tawo ug sa komunidad.
Busa, magpadayon ang PRO7 sa lig-on nga operasyon aron mapapas ang ilegal nga drogas ug masiguro ang kaluwasan sa katawhan.
Dugang pa sa PRO7, magpadayon ang ilang intelligence-driven operations ug pakig-alayon sa ubang ahensya sa gobyerno ug sa komunidad aron mapadayon ang hapsay ug luwas nga mga komunidad sa tibuok Central Visayas.
Source: PRO7 PIO
I via Renante Socia Lada