Nagmalampuson ang Cebu Provincial Government sa pagpahigayon og dako nga job fair sa Capitol Social Hall sa miaging weekend, diin 73 ka aplikante ang na-hire dayon o “hired-on-the-spot” gikan sa kapin 10,000 ka job vacancies para sa lokal ug abroad.
Gipanguluhan ang kalihokan ni Gob. Pamela Baricuatro uban sa mga opisyal sa Department of Migrant Workers (DMW) lakip si Secretary Hans Leo J. Cacdac, nga nagpakita sa lig-on nga suporta sa gobyerno alang sa mga mangitag trabaho sa probinsya.
Aron mapaspasan ang proseso sa pag-apply, gibutang ang usa ka one-stop shop nga adunay kapin 30 ka partner agencies sama sa DMW, DOLE, OWWA, DTI, TESDA ug SSS. Apil usab sa kalihokan ang “Buy Lokal, By OFWs” trade fair ug libre nga wellness services alang sa mga aplikante.
Usa sa pinakamahinungdan nga bahin sa event mao ang “Bagong Bayani Ng Mundo Kumustahan,” usa ka sesyon nga mitabang sa 26 ka OFWs nga bag-o lang nakauli gikan sa Middle East aron maatubang ang ilang emosyonal ug mental nga kahimtang. Duha niini nila nakakuha dayon og trabaho atol sa job fair.
Sa iyang mensahe, gipasabot ni Gob. Baricuatro nga andam ang probinsya sa pagtabang sa mga OFWs sa ilang pagbalik ug pagsugod pag-usab. Matud niya, bisan lisod ang ilang nasinati, ang Cebu magpabiling ilang panimalay.
Pinaagi niini nga inisyatiba, gipakita sa Kapitolyo ang ilang dedikasyon sa pagpalig-on sa ekonomiya ug paghatag og oportunidad aron matag Cebuano makakita og angay nga trabaho ug mas maayong kaugmaon.
Source: Cebu Province PIO
I via Renante Socia Lada