Gikustodiya sa kapulisan ang usa ka 20-anyos nga estudyante human kini gikatahong miingon nga may bomba sa bag sa Cebu Technological University (CTU)-Argao Campus kagahapon Agosto 25, 2026.
Sumala sa Cebu Police Provincial Office (CPPO), nahadlok ang security guard atol sa regular nga inspeksyon sa entrada sa eskwelahan.
Gitaho dayon sa guard ang maong pamulong sa Argao Municipal Police Station.
Dali nga miresponde ang mga pulis ug miadto sa campus aron susihon ang sitwasyon.
Gikustodiya ang estudyante alang sa hustong proseso ug aron mapugngan nga mosamot ang sitwasyon.
Matud ni CPPO Provincial Director PCOL Abubakar Udang Mangelen Jr., nakatabang ang Police-to-School Deployment Scheme sa paspas nga pagresponde sa insidente.
Gipasiugda usab niya ang importansya sa kooperasyon tali sa kapulisan, security guards ug mga opisyal sa eskwelahan.
Gipahinumdoman ni Mangelen ang mga estudyante nga seryosohon ang mga pulong bahin sa bomba o hulga. Bisan og joke lamang ang tuyo, mahimo kini makapahadlok sa mga tawo, makabalda sa klase ug makapapukaw sa paspas nga pagresponde sa mga awtoridad.
📸 CPPO
I via Renante Socia Lada