Lima ka suspetsado sa illegal nga drugas ang nadakpan samtang 561 ka menor de edad ang naluwas atol sa usa ka semana nga “Oplan Bulabog” sa Cebu City Police Office (CCPO) nga gipahigayon gikan sa Marso 31 hangtod Abril 6, 2025.
Ang operasyon, ilawom sa “One-Time-Big-Time” nga kampanya, gisalmutan sa libo-an ka mga personahe sa kapulisan, lokal nga panggamhanan, force multipliers ug mga boluntaryo, nga mituyok sa tanang 80 ka barangay sa dakbayan.
Sa nasayran, 3,248 ka establisyemento ang gisusi atol sa operasyon, diin nadakpan ang lima ka indibidwal nga nalambigit sa illegal nga drugas. Nakuha gikan sa mga suspetsado ang gidudahang P11,832 nga kantidad sa illegal nga drugas, ug armas de fuego nga walay legal nga dokumento.
Gawas sa mga dakop, 561 ka minor de edad ang naluwas sa mga dapit nga adunay curfew violations. Gihatagan sab og 23 citation tickets ang mga nakalapas sa ordinansa sa public drinking, panigarilyo ug pagpanglabay og basura.
Gipasiugda ang operasyon ni PCOL Enrico E. Figueroa, Acting City Director sa CCPO, uban sa suporta sa PRO-7 Regional Director PBGEN Redrico A. Maranan.
Sumala sa kapulisan, nagpadayon ang ilang hugot nga kampanya batok sa krimen ug kahugawan aron mapalig-on ang seguridad sa komunidad.
Source: CCPO
I via Renante Socia Lada
#rpndykccebu