Nagpadayon ang Cebu Police Provincial Office (CPPO) sa ilang gipakusog nga Safer Cities Initiative, diin 496 ka tawo ang nadakpan tungod sa nagkalain-laing paglapas sa mga lokal nga ordinansa atol sa mga anti-criminality operations nga gihimo sa tibuok lalawigan sa Sugbo niadtong Mayo 31, 2026.
Sumala sa CPPO, adunay 210 ka operasyon nga nahimo nga mitultol sa pagdakop sa mga nakalapas sa balaod. Lakip sa mga natala nga kaso ang 67 ka tawo nga nag-inom og ilimnong makahubog sa publikong lugar, 16 ka kaso sa pagpanigarilyo sa publikong lugar, 21 ka tawo nga nagsuroy nga walay sapot sa ibabaw nga lawas, 56 ka menor de edad nga nakalapas sa curfew, 10 ka kaso sa videoke o karaoke nga milapas sa gitugot nga oras, 324 ka paglapas sa mga ordinansa sa trapiko, ug duha ka kaso nga may kalabotan sa mga ilegal nga istruktura ug mga babag sa karsada.
Sa kinatibuk-an, 324 ka mga nakalapas gipamulta samtang 172 ang gipasidan-an ug gipagawas subay sa mga lokal nga ordinansa ug hustong pamaagi. Nakolekta usab ang kinatibuk-ang ₱130,550 nga multa ug silot gikan sa operasyon.
Gipadayag ni CPPO Provincial Director PCOL Abubakar Udang Mangelen Jr. nga importante ang padayon nga pagpatuman sa mga ordinansa aron mapugngan ang kagubot ug kriminalidad sa komunidad. Matud niya, ang disiplina ug kooperasyon sa mga residente dakong tabang sa pagmintinar sa kalinaw ug kahapsay sa lalawigan.
Gidayeg usab ni PRO-7 Regional Director PBGEN Arnold Evangelista Abad ang dedikasyon sa kapulisan ug mga lokal nga opisyal sa pagpalig-on sa preventive policing ug community-centered law enforcement aron masiguro ang kaluwasan sa mga komunidad.
Samtang, gipasig-uli ni Cebu Governor Pamela S. Baricuatro ang suporta sa kagamhanan sa lalawigan sa mga programa nga nagpalambo sa disiplina, kalinaw ug kahapsay. Matud niya, pinaagi sa lig-on nga panaghiusa sa kapulisan, lokal nga kagamhanan ug katawhan, magpadayon ang pagtukod sa mas luwas ug mauswagon nga Sugbo.
Gipasalig sa CPPO nga ipadayon pa nila ang agresibong pagpatuman sa Safer Cities Initiative aron mapadayon ang malinawon, organisado ug luwas nga mga komunidad alang sa tanang Sugboanon.
I via Renante Socia Lada