Malampuson nga gipahigayon sa Department of Social Welfare and Development Field Office VII (DSWD FO 7) ang “Saulog Pantawid Pamilyang Pilipino Program (4Ps) Ceremonial Graduation” kagahapon Abril 10, 2026 sa Consolacion Gymnasium sa Cebu.
Gitambongan ang maong kalihokan ni Innovation Division Chief Margie Pinton nga nagrepresentar kang Regional Director Shalaine Marie Lucero, uban sa mga 4Ps staff ug mga opisyal sa lungsod nga gipangulohan ni Mayor Teresa Alegado sa lungsod sa Consolacion.
Sa kinatibuk-an, 427 ka mga benepisyaryo sa 4Ps ang opisyal nga mi-graduate sa programa human makab-ot ang lebel sa pagka-self-sufficient o kaya na nila magpadayon bisan wala na ang tabang sa gobyerno.
Isip suporta sa ilang bag-ong pagsugod, naghatag ang Consolacion Municipal Government og livelihood assistance nga nagkantidad og ₱8,000 hangtod ₱10,000 matag pamilya. Ang mga barangay usab mitabang pinaagi sa paghatag og lima ka kilo nga bugas, samtang ang Municipal Agriculture Office nag-apod-apod og mga punuanan nga mamunga aron makatabang sa ilang pagkaon ug panginabuhi.
Gipasabot sa DSWD nga ang maong graduation dili pasabot nga biyaan na ang mga pamilya, kundili usa ka selebrasyon sa ilang kalamboan. Nagpasabot kini nga andam na silang mopadayon sa kinabuhi nga adunay kumpiyansa ug dignidad bisan wala na ang diretsong ayuda gikan sa gobyerno.
Source: DSWD-7
I via Renante Socia Lada