Nagpadayon sa pagpatuman sa mas hugot nga kampanya batok sa mga paglapas sa ordinansa ang Cebu City Police Office (CCPO) ubos sa pagpanguna ni Police Colonel George V Ylanan, City Director, pinaagi sa Safer Cities Initiative. Kagahapon Abril 10, 2026 gikan alas 12:01 sa tungang gabii hangtod alas 4:30 sa hapon, gi-implementar ang Oplan Bulabog, Oplan Bakal Sita, ug Oplan Pakigsandurot sa nagkadaiyang bahin sa siyudad.
Sa maong operasyon, dunay kinatibuk-an nga trese (13) ka operasyon ang gihimo nga miresulta sa 71 ka mga nahisgutan nga paglapas ug nakolekta og multa nga mokabat sa ₱51,000.00. Gipakita niini ang padayon nga kampanya sa kapulisan aron mapahimutang ang kahapsay ug disiplina sa siyudad.
Lakip sa mga natala nga paglapas mao ang pag-inom og alkohol sa pampublikong lugar, pagpanigarilyo sa public areas, ug paglakaw nga walay sinina. Nabantayan usab ang curfew violations diin daghang menor de edad ang nasakpan ug nare-rescue, dugang pa ang illegal structures o road obstructions ug mga paglapas sa City Traffic Ordinance.
Sa tibuok operasyon, 52 ka mga violators ang gipamulta, samtang 32 ang gihatagan og warning ug dayon gibuhian. Sumala sa CCPO, ang mga aksyon dili lang para sa pagdakop kundili para usab sa pagpasidaan ug pag-edukar sa publiko.
Gipasiugda ni PCOL Ylanan nga ang Safer Cities Initiative usa ka paagi aron mapalambo ang kaluwasan ug disiplina sa komunidad. Giawhag niya ang publiko nga motahod ug mosunod sa mga lokal nga ordinansa kay ang kalinaw ug kahapsay sa siyudad nagdepende sa kooperasyon sa matag usa.
Source: CCPO
I via Renante Socia Lada