Gi bana bana nga niabot ngadto sa 4 milyones ka mga tawo ang misaksi sa Sinulog 2025 sa dakbayan sa Sugbo. Kini ang gibutyag sa Cebu City Disaster Risk Reduction and Management Office ug Cebu City Police Office.
Ang maong ihap naglakip sa mga tao nga naa sa Plaza Independencia, sulod sa Basilica Minore del Santo Niño, ug mga malls sa dakbayan nga adunay Sinulog-related activities.
Ang kalihokan nagsugod pinaagi sa Santos nga Misa nga gipahigayon sa Cebu City Sports Center (CCSC) pasado alas 8 sa buntag. Gisundan kini sa opisyal nga pag-abli sa street dancing competition nga gisalmutan sa kapin 100 ka contingents. Ang carousel route, nga 6 ka kilometro ang gitas-on, milabay sa mga kadalanang P. Del Rosario Street, Imus Avenue, General Maxilom Avenue, Mango Avenue, ug Osmeña Boulevard.
Tungod sa daghang tawo, ang CCSC kinahanglang isira ang mga ganghaan niini samtang naabot na ang full capacity. Bisan pa man sa kadaghan sa mga partisipante, nagpabiling malinawon ug hapsay ang dagan sa kalihokan, base sa report sa Cebu City Police Office.
Ang mga nisalmot nagagikan sa nagkadaiyang lugar sa nasud lakip ang mga langyaw. (Renante Socia Lada)