DIPOLOG CITY — Miabot sa 23 ka job seekers ang dayong nadawat sa trabaho o “hired on the spot” atol sa Mega Job Fair nga gipahigayon sa Zamboanga del Norte Convention and Sports Center.
Ang kalihukan gipasiugdahan sa Trabaho Partylist uban sa suporta sa Provincial Government pinaagi sa PESO ug Department of Labor and Employment (DOLE), diin 789 ka aplikante ang narehistro—usa sa pinakadaghan nga turnout nga natala.
Sumala kang Acting Provincial Administrator ug PESO Manager Charmie Asprer-Yu, maoy unang job fair nga gi-facilitate sa probinsya sukad paglingkod ni Governor Darel Uy, ug dako ang papel niini sa paghatag dayong oportunidad sa mga nangitag trabaho.
Usa sa mga nakabenepisyo si Ritchel Joy Retes, usa ka bag-ong graduate sa Jose Rizal Memorial State University, nga nakasulod dayon sa trabaho samtang naghulat sa resulta sa board exam, usa ka patunay sa kahigayunan nga gidala sa maong job fair.(JENNIFER JR. DELICA)
Source: Zamboanga del Norte Provincial News Network