Tulo ka mga suspek ang nadakpan sa sunod-sunod nga operasyon sa kapulisan nga gipasiugdahan sa Cebu City Police Office (CCPO) batok sa ilegal nga armas, nga gipahigayon gikan Hunyo 23 hangtod 29, 2025. Ang operasyon gidumala sa mga Police Stations 3, 7 ug 11, ubos sa mando ni Acting City Director PCOL Enrico E. Figueroa.
Ang mga operasyon gibase sa search warrants nga gi-isyu sa Regional Trial Court Branch 17 sa Cebu City. Nasikop ang mga suspetsado nga sila si alyas “Junjun”, 28 anyos nga ex-convict nga taga Brgy. Basak San Nicolas; si alyas “Bugs Daygo”, 37 anyos nga taga Brgy. San Roque; ug usa ka 32 anyos nga lalaki nga taga Brgy. Sudlon 2, Cebu City.
Sa ilang operasyon, nasakmit ang daghang armas ug bala, nga karon gamiton isip ebidensya sa mga kaso nga ipasaka batok sa mga suspetsado. Ang tulo gipasanginlan nga nakalapas sa Republic Act 10591 o ang Comprehensive Firearms and Ammunition Regulation Act.
Gipasalig ni PCOL Figueroa nga padayon ang ilang paningkamot sa pagpahunong sa pagpangapod-apod sa mga ilegal nga armas, nga posible gamiton sa mga krimen.
Gipahimug-atan niya nga ang mga operasyon kabahin sa estratehiya sa CCPO aron mapadayon ang kalinaw ug kahapsay sa dakbayan.
Ang operasyon usab subay sa direktiba ni Police Regional Office 7 Director PBGEN Redrico A. Maranan, nga nagtumong sa lig-on nga kampanya batok kriminalidad ug sa pagpanalipod sa katawhan sa dakbayan sa Sugbo.
Source: CCPO
I via Renante Socia Lada