Nadakpan ang 15 ka wanted persons ug 42 pa ka lain nga mga suspek sa sunod-sunod sa anti-criminality operations nga gipahigayon sa Cebu City Police Office (CCPO) gikan Hunyo 20 hangtod 26, 2025.
Gipangunahan ni Acting City Director PCOL Enrico E. Figueroa, ang operasyon kabahin sa paningkamot sa kapulisan nga mapalig-on ang kaluwasan ug kalinaw sa siyudad. Kini nga mga lakang nakasuporta usab sa programa ni Police Regional Office 7 Director PBGEN Redrico A. Maranan.
Sa sulod sa usa ka semana, 57 ka mga tawo ang nadakpan tungod sa lain-laing mga kaso sama sa pagbaligya og ilegal nga drogas, pagpanag-iya og pusil nga walay rehistro, ug sa pag-serve sa mga warrant of arrest.
Sa 30 ka drug operations sa tibuok siyudad, nakasakmit ang CCPO og gibana-bana nga ₱1,283,840 nga kantidad sa ilegal nga drogas, nga shabu. Nakuha usab ang 5 ka pusil nga ilegal nga usa ka dakong lakang batok sa krimen.
Giingon sa CCPO nga ang ilang padayon nga operasyon usa ka paagi aron mabati sa katawhan ang seguridad, mapakunhod ang krimen, ug mapauswag ang kalidad sa kinabuhi sa mga taga-Cebu City.
Padayon ang kapulisan sa pagpatuman sa mga lakang nga makatabang makalikay ang komunidad sa kadaot sa krimen ug makab-ot ang usa ka mas luwas nga siyudad.
Source: CCPO
I via Renante Socia Lada