Usa ka dakong trahedya ang miigo sa usa ka pamilya sa Barangay Mambaling, diin tulo ka gagmayng bata ang namatay atol sa usa ka sunog nga nahitabo sa ilang balay ug sa ilang mga silingan sa Sitio Mabapu, Bayabas St., pasado alas 8:00 sa buntag, Sabado, Marso 29, 2025.
Ang mga biktima nga nagpanuigon og 6,5 ug 3 anyos anak sa pamilyang Siaboc.
Matud sa mga silingan, ang mga bata nabilin sa balay samtang nagtrabaho ang ilang ginikanan. Ang inahan sa Carbon Market ug ang amahan nagmaneho og e-bike. Sa dihang misilaab ang kayo, wala sila makagawas ug nabilin sa ikaduhang andana sa ilang balay nga hinimo lamang sa light materials.
Naghilak og nangayo og panabang ang mga bata apan bisan sa gibuhat na sa mga silingan ang pagluwas naglisud sila kay gisirad-an ang ilang balay. Ang sunog daling mitakod sa ubang balay, hinungdan nga daghang pamilya ang naapektuhan.
Ang kabomberohan padayon nga nag-imbestigar sa hinungdan sa sunog, samtang ang komunidad nagtinabangay sa pagpanghatag og ayuda sa pamilya sa mga biktima.
Ang maong panghitabo nagpahinumdom na dili ibilin ang bata sa balay labi na mga gabmay pa kini ug gi kandaduhan kung sila ra ang mabilin. (Renante Socia Lada)