Nakumpiska sa mga operatiba sa Philippine Drug Enforcement Agency (PDEA)-7 ang tulo ka kilo nga gipauga nga ilegal nga marijuana nga gipadala pinaagi sa parcel. Nagkantidad kini og P360,000 ug gituohang gikan sa National Capital Region (NCR).
Ang operasyon gilusad pinaagi sa Seaport Interdiction Unit sa PDEA-7 sa usa ka bodega sa package forwarding company nga nahimutang sa Barangay Subangdaku, Mandaue City, Disyembre 6, 2024.
Sumala ni Leia Alcantara, tigpamaba sa PDEA-7, nadiskobrehan ang maong parcel atol sa random K9 inspection. Ang K9 dog nihimo og indikasyon pinaagi sa paglingkod atubangan sa parcel, nga nagpasabot nga adunay sulod nga ilegal nga kontrabando.
Ang mga parcel gihatod dayon sa Regional Laboratory sa PDEA-7 alang sa mas detalyadong pagsusi ug pagsiguro nga magamit kini isip ebidensya sa kaso nga ipasaka batok sa mga responsable.
Padayon ang PDEA-7 sa ilang paningkamot nga makunhuran ang pagpasa-pasa sa ilegal nga droga pinaagi sa mga logistics ug forwarding services sa rehiyon. Ang ahensya nanawagan usab sa publiko nga magpakabana ug ipahibalo dayon kung adunay kahibalo bahin sa susamang aktibidad. (Renante Socia Lada)