Usa ka pedestrian ang naangol human nabanggaan sa usa ka ambulansiya didto sa M.C. Briones St., Mandaue City, kagahapon sa udto, Disyembre 6, 2024.
Sumala ni Hyll Retuya, hepe sa Traffic Enforcement Agency of Mandaue (TEAM), ang lalaki nitabok sa dalan dihang niagi ang ambulansiya nga adunay sakay nga pasyente.
Ang ambulansiya gipanag-iya sa LGU sa Danao City. Ang maong insidente nakamugna og diriyut nga traffic sa maong lugar. Ang ambulansiya ug ang drayber niini gibantayan karon sa Traffic Enforcement Unit sa Mandaue Police samtang nagpadayon ang imbestigasyon.
Gipahimangnoan ni Retuya ang mga pedestrian ug mga drayber nga magmatngon ug hatagan og prioridad ang mga emergency vehicles aron malikayan ang susama nga mga insidente. (Renante Socia Lada)
(Source: TEAM)