Nadugangan pa sa 11 ka tawo ang gipasakaan og kaso sa Regional Anti-Cybercrime Unit 7 (RACU 7) niadtong Agosto 1, 2025, may kalabotan sa ongoing nga imbestigasyon sa giingong scam hub nga nadiskobrehan sa IT Park, Cebu City. Ang total nga ihap sa mga personalidad nga gi-kasohan karon misaka na sa 24.
Gisubay sa mga otoridad ang ilang pagkatawo pinaagi sa CCTV footage ug digital nga ebidensya. Ang mga gi-kasohan gipasanginlan nga nakalapas sa Section 11 (Investment Fraud) sa Republic Act 11765 o Financial Products and Services Consumer Protection Act, nga gilambigit usab sa Section 6 sa Cybercrime Prevention Act (RA 10175).
Ang labing bag-ong mga respondents giila pinaagi sa ilang mga alyas nga sila si Frank, Judelyn, Benson, Bryll Anthony, Lilidel, Esperanza, Benedict, Joseph James, Rex Chilton, Shaira, ug Rowel. Sila gituhuan nga kalambigit sa iligal nga operasyon sa scam hub.
Sa miaging mga semana, sunod-sunod ang mga kaso nga gipasaka batok sa uban pang mga personalidad: usa ka operator niadtong Hulyo 4, tulo ka tawo sa Hulyo 11, tulo usab sa Hulyo 18, ug unom sa Hulyo 25. Ang pinakabag-o, 11 ka tawo, ang gikasohan sa Agosto 1.
Matod ni PBGEN Redrico A. Maranan, Regional Director sa Police Regional Office 7, nga matag kaso nga ilang gi-file, nagkadool sa tinuod nga kinatibuk-ang listahan sa mga nalambigit sa maong scam hub.
Gihangyo usab sa kapulisan ang publiko nga motabang ug mohatag og dugang impormasyon kabahin sa uban pang wala pa mailhi nga suspek.
Source: PRO7
I via Renante Socia Lada