Duha ka centenarian ang gipangpasidungog sa Cebu Provincial Government ug nakadawat og tag-₱100,000 matag usa isip pag-ila sa ilang edad ug inspirasyon sa katawhan.
Si Alejandra Soon Manoriña, lumulupyo sa Barangay Garing, Consolacion, natawo niadtong Mayo 3, 1925 ug karon 100 anyos na. Giingon niya nga ang sekreto sa taas nga kinabuhi mao ang pagkaon og gulay ug dili mokaon og karne. Niadtong Septiyembre 12, 2025, gihatagan siya sa Kapitolyo sa cash gift nga ₱100,000 pinaagi sa Provincial Social Welfare and Development Office (PSWDO), uban ang tabang sa Consolacion MSWDO ug Office of Senior Citizens Affairs.
Ang turnover ceremony gihimo uban nila Provincial Board Member Alfie Ouano, Vice Mayor Joannes “Joyjoy” Alegado, Brgy. Captain Wesley Alimoren, ug mga konsehal sa barangay. Nalipay ang pamilya ni Manoriña nga makita nga giila ang ilang inahan nga nagmalahutay hangtod sa pagkakaron.
Samtang sa Dakbayan sa Mandaue, laing centenarian nga si Leon Balonan, natawo niadtong Hunyo 28, 1925, nakadawat usab sa ₱100,000 gikan sa Kapitolyo. Ang iyang sekreto sa taas nga kinabuhi mao ang pagkaon og himsog nga pagkaon.
Ang turnover ceremony gipangulohan ni PB Member Olin Seno uban si Brgy. Captain Romulo Echavez Jr., mga konsehal sa Ibabao-Estancia, ug mga konsehal sa Mandaue City uban ang tabang sa PSWDO, OSCA ug CSWDO staff. Kini nga programa nagpakita sa suporta ug paghatag pasidungog sa mga tigulang nga nakahatag inspirasyon sa komunidad.
Source: Cebu Provincial Capitol PIO
I via Renante Socia Lada