Padayon ang hugot nga kampanya sa Cebu City Police Office (CCPO) ilawom sa liderato ni Officer-in-Charge PCOL GEORGE V YLANAN batok kriminalidad ug iligal nga drogas, ilabi na sa pagpanalipod sa kabatan-onan gikan sa kadaot nga dala sa drug syndicates. Gikan Nobyembre 21 hangtod 27, 2025, nakapahigayon ang CCPO ug sunod-sunod nga operasyon nga misangpot sa pagdakop sa 87 ka indibidwal nga nalambigit sa iligal nga drogas, sugal, ug pagpanag-iya ug armas nga walay papeles.
Dako ang epekto sa operasyon sa pagbungkag sa pipila ka criminal groups nga naglihok sa lain-laing barangay sa siyudad, ug nagamit sa kabatan-onan isip target sa ilang iligal nga kalihukan. Nakuha sa Drug Enforcement Unit ang gitoohang shabu nga adunay kantidad nga ₱4,717,024, usa ka dako nga kadaugan batok sa mga lokal nga drug distributor nga naghulga sa kahapsay ug kahimtang sa mga batan-on sa Cebu.
Sa laing bahin, napusasan usab ang napulog siyam (19) ka suspetsado nga adunay outstanding warrants of arrest sa lahi-lahi nga police operations. Kini nagpakita sa padayon nga paningkamot sa CCPO sa pagpangita, pagdakop, ug pagpasaka sa hustisya batok sa mga tawo nga dunay kasal-anan sa balaod.
Gawas sa drug-related arrests, nakarekober ang kapulisan ug pito (7) ka iligal nga armas, pipila niini nakuha gikan mismo sa armado nga suspek. Ang pagkuha niini nga mga armas nakapamenos sa peligro sa bayolente nga krimen ug nakahatag sa dugang seguridad sa komunidad.
Ang tanang kalampusan nakaangkon pinaagi sa pagtinabangay sa PRO 7 ilawom sa pagdumala ni Regional Director PBGEN REDRICO A MARANAN, nga nagpalig-on sa tumong sa rehiyon nga mapugngan ang kriminalidad ug masiguro ang malinawon nga komunidad. Si PCOL Ylanan mipasalig nga magpadayon ang CCPO sa walay puas nga operasyon aron maprotektahan ang katawhan ug mapalig-on ang pagsalig sa publiko.
Ang CCPO nag-awhag sa katawhan sa pagpakabana ug pagreport dayon sa bisan unsang kahilakon o iligal nga kalihukan sa labing duol nga police station aron mas mapadali ang pagresponde ug pagmintinar sa kalinaw sa siyudad.
Source: CCPO
I via Renante Socia Lada