Nasalbar ang 131 ka mga minor de edad ug na-inspeksyon ang 1,605 ka mga establisemento sa usa ka semana nga operasyon sa Cebu City Police Office (CCPO) nga gitawag OPLAN BULABOG ug OPLAN BAKAL-SITA, nga nagsugod sa gabii sa Hunyo 23 hangtod sayo sa buntag sa Hunyo 29, 2025.
Gipangunahan kini ni PCOL Enrico E. Figueroa, ang Acting City Director sa CCPO, uban sa tabang sa tanang police stations sa siyudad ug sa suporta ni PBGEN Redrico A. Maranan, ang Regional Director sa Police Regional Office 7.
Tumong sa operasyon ang pagpalig-on sa kaluwasan sa tanang 80 ka barangay sa Cebu City, pinaagi sa pagsiguro nga matuman ang mga ordinansa ug malikayan ang mga krimen.
Lakip sa ilang nahimo mao ang pagdakop sa usa ka 28-anyos nga lalaki gikan sa Barangay Mambaling tungod sa pagpanag-iya og ilegal nga drogas nga gibana-banang nagkantidad og ₱1,360. Nakuha gikan kaniya ang 0.20 gramos nga gituhuang shabu.
Giingon ni PBGEN Maranan nga importante ang presensya sa kapulisan labi na sa mga lugar nga daghang krimen, ug kinahanglan ang kooperasyon sa mga ahensya aron mas epektibo ang pagpugong sa krimen ug mas luwas ang komunidad.
Padayon ang CCPO sa ilang paningkamot nga masiguro ang kalinaw ug kaluwasan sa mga Sugboanon, uban ang tabang sa LGU, barangay, ug mga boluntaryong grupo.
Source: CCPO
I via Renante Socia Lada