Kapin 1,400 ka mga drayber ug konduktor sa bus ug van-for-hire ang milinya sa Cebu South Bus Terminal niadtong Huwebes, Abril 16, 2026, aron makadawat og libreng 10 ka kilo nga bugas gikan sa Cebu Provincial Government.
Ang maong ayuda gipanghatag ubos sa programa sa Provincial Social Welfare and Development Office (PSWDO), isip tabang sa mga transport workers nga naapektuhan sa pagsaka sa presyo sa lana ug mga batakang palaliton.
Sumala sa kapitolyo, kabahin kini sa padayon nga paningkamot sa administrasyon ni Gobernador Pamela Baricuatro aron maibanan ang kabug-at sa panginabuhi sa mga drayber ug konduktor nga nag-atubang og kalisod sa adlaw-adlaw nga gasto.
Ang distribusyon gihimo sa Cebu South Bus Terminal diin organisado ang paglinya sa mga benepisyaryo aron masiguro ang hapsay ug patas nga pag-apod sa bugas.
Padayon ang Cebu Provincial Government sa paghatag og lain-laing porma sa ayuda alang sa mga sektor nga labing naapektuhan sa kasamtangang kahimtang sa ekonomiya sa nasud.
Source: Cebu Province PIO
I via Renante Socia Lada