Nadiskubre sa mga otoridad ang usa ka gidudahang shabu laboratory nga nahimutang sa usa ka apartment sa D. Jakosalem Street, Cebu City niadtong Lunes sa buntag, Hunyo 30, 2025.
Ang maong operasyon nahimo pinaagi sa hiniusang lihok sa nagkadaiyang ahensya sa gobyerno. Gipangunahan sa Police Regional Office 7 (PRO-7), Philippine Drug Enforcement Agency-Central Visayas (PDEA-7), ug Cebu City Police Office (CCPO) ang maong operasyon nga nagresulta sa pagkadiskobre sa ilegal nga aktibidad.
Ang lugar gilakip sa ilang surveillance base sa ilang nadawat nga impormasyon. Usa ka chemical engineer ang giila nga suspetsado na posibleng nagdumala sa produksiyon sa ginadiling drogas sa maong apartment.
Gituohan nga maoy responsable sa teknikal nga aspeto sa paghimo sa shabu. Sa gihimo nga imbestigasyon sa mga otoridad, nakuha sa sulod sa apartment ang mga gamit nga kasagarang gigamit sa drug processing sama sa mga chemical container, burner, ug pipila ka mga kemikal.
Gipanghimakak sa suspek ang ilang kalambigitan sa drogas apan padayon kini nga gisusi. Padayon karon ang imbestigasyon aron masuta ang tibuok network sa kalihokan, lakip na kung aduna bay uban pang lugar sa syudad nga gigamit sa susama nga operasyon.
Gipasalig sa kapulisan ang mas hugot nga pagbantay ug operasyon batok sa ilegal nga drogas sa tibuok Central Visayas.
via Renante Socia Lada