Luwas ug kompleto ang siyam ka pasahero ug ang kapitan sa usa ka motorbanka human kini mitikyaob duol sa Sulpa Island, gawas sa Olango Island, alas 5:50 sa hapon sa Hunyo 22, 2026.
Sumala sa report, padulong unta ang mga pasahero sa Pangan-an Island aron motambong sa usa ka kasal karong Hunyo 23. Apan tungod sa kusog nga balod ug dili maayong panahon, napalong ang makina sa ilang gisakyan nga motorbanka nga maoy hinungdan sa aksidente.
Diha-diha dayon nga mitubag ang mga personnel sa Coast Guard Clearing Outpost Marigondon, CDRRMO, CENRO-Coastal Resource Management, Philippine Red Cross, ug Marigondon BDRRMO aron masusi ug matabangan ang mga naluwas. Gitabangan usab sa Lapu-Lapu City Police Office ang rescue operation.
Giluwas sa Search and Rescue Team, CENRO-Coastal Resource Management, ug TagaDagat Search and Rescue ang tanang pasahero ug nadala paingon sa Marigondon Port ang mitaob nga motorbanka. Miabot ang rescue team sa pantalan alas 8:06 sa gabii, ug walay natalang namatay o grabeng naangol sa insidente.
I via Renante Socia Lada