Nadakpan ang 39 ka mga suspek sa ilegal nga drogas ug nasakmit ang kapin ₱1.47 milyon nga kantidad sa shabu sa sunod-sunod nga operasyon sa Police Regional Office 7 (PRO7) sa tibuok Central Visayas gikan Marso 13 hangtod Marso 14, 2026.
Sumala sa PRO7, mokabat sa 216.25 gramos nga gituohang shabu ang nakompiskar sulod sa 24 ka oras nga operasyon.
Ang pinakadako nga nasakmit narekord sa operasyon sa Cebu City Police Office (CCPO) pinaagi sa mga operatiba sa Police Station 2 atol sa buy-bust operation alas 9:30 sa gabii niadtong Marso 13 sa Sitio San Roque, Barangay Sambag 1, Cebu City.
Sa maong operasyon, nadakpan ang 23 anyos nga High Value Individual (HVI) ug nakuha gikan kaniya ang 160 gramos nga gituohang shabu nga adunay balor nga ₱1,088,000.
Gidayeg ni PBGen. Redrico A. Maranan, Regional Director sa PRO7, ang mga pulis nga nagpatuman sa operasyon tungod sa ilang dedikasyon sa pakigbatok sa ilegal nga drogas.
Matod niya, padayon nilang palig-onon ang intelligence-driven operations ug pakigtinabangay sa komunidad aron mapriso ang mga tawo nga nalambigit sa ilegal nga drogas ug mapadayon ang kalinaw ug kahapsay sa rehiyon.
Source: PRO7 PIO
I via Renante Socia Lada