Nadakpan sa kapulisan ang usa ka high-value drug personality ug nakumpiskar ang kapin ₱1.1 milyon nga kantidad sa gituohang shabu atol sa buy-bust operation sa Purok 5, Fatima, Ubay, Bohol, alas 5:32 sa buntag, Agosto 13, 2025.
Ang operasyon gipangulohan sa Municipal Drug Enforcement Team (MDET) sa Ubay Police Station ubos ni PCPT Amelito M. Melloria, uban ang PDEA. Nakuha sa mga otoridad ang 170 gramos sa gituohang shabu nga adunay banabana nga kantidad nga ₱1,156,000. Gamit ang usa ka tinood nga ₱1,000 bill nga gisagol sa ₱33,000 boodle money, nasikop ang suspetsado nga 30 anyos, single, ug walay trabaho.
Sumala ni PCOL Arnel Banzon, Provincial Director sa BPPO, klaro nga timaan kini nga padayon ang walay hunong nga kampanya batok sa iligal nga drogas sa probinsya.
Gipasidunggan usab ni PLTCOL Norman Nuez ang Ubay MPS sa hapsay nga operasyon ug nag-awhag sa katawhan nga ipadayon ang pakigtambayayong aron mabungkag ang iligal nga drug trade.
Ang suspetsado anaa na sa kustodiya sa kapulisan ug pasakaan og kaso ilawom sa RA 9165. Giawhag sa mga otoridad ang tanan nga molikay sa iligal nga drogas ug dayon nga mopahibalo sa kapulisan o barangay kung adunay suspicious nga kalihokan.
Source: Bohol PNP
I via Renante Socia Lada