Usa ka Move It rider ang naangol human mosukol sa duha ka armadong tulisan nga mitulis sa duha ka delivery truck drivers sa Uldog Street, Barangay San Isidro, kahapon sa hapon, Agosto 13, 2025.
Ang biktima nga rider giila nga si Ricky Recaplaza, 26, residente sa Ramona Village II, San Isidro. Nasayran nga giatake kini sa mga suspetsado nga sakay sa puti nga Honda Beat motorcycle ug armado og .38 kalibre nga revolver, human kini motabang sa duha ka truck drivers nga gitulis.
Ang mga driver nga si John Cker Saavedra, 52, taga Sawang Calero, ug Renard Obeñita, 35, taga Inayawan, pulos gikan sa Cebu City, nakuhaan og halin nga kapin ₱91,000 gikan sa ilang gideliver nga beer products ug softdrinks. Nahitabo ang insidente pasado alas 2:00 sa hapon samtang nagpaingon sila sa usa ka kan-anan.
Sa kasamtangan, gikuha na sa Talisay City Police ang CCTV footage sa lugar aron masuta ang identidad sa mga suspek. Padayon usab ang pagpangita sa duha ka tulisan nga dali midagan palayo human sa insidente.
I via Renante Socia Lada