Nasakmit sa kapulisan ang kapin usa ka kilo nga giingong shabu nga nagkantidad og ₱7,038,000 ug usa ka cal. 45 pistol sa operasyon nga gihimo sa Barangay San Isidro, Tagbilaran City niadtong Agosto 12, 2025.
Base sa report sa Bohol Police Provincial Office, mga alas 6:51 sa gabii gisugdan ang buy-bust operation sa Provincial Drug Enforcement Unit uban ang Tagbilaran City Police Station, Regional Intelligence Division 7, Regional Intelligence Unit 7, PDEA-Bohol, ug Special Operations Unit sa PNP Drug Enforcement Group batok sa usa ka high-value target.
Nakuha gikan sa suspetsado ang usa ka medium heat-sealed sachet sa giingong shabu, unom ka medium sachets ug napulo ka large packs, usa ka cal. 45 pistol nga adunay magasin, ug ubang drug paraphernalia. Ang droga adunay gibug-aton nga 1,035 gramos ug gi-ila nga nagkantidad og ₱7,038,000 sumala sa Standard Drug Price. Karon, anaa na kini sa Bohol Provincial Forensic Unit alang sa pormal nga eksaminasyon.
Ang suspetsado kasamtangang gidetener sa Tagbilaran City Police Station ug atubangon ang kaso sa paglapas sa Republic Act 9165 o Comprehensive Dangerous Drugs Act of 2002 nga adunay silot nga tibuok kinabuhi nga pagkabilanggo, ug Republic Act 10591 o Comprehensive Firearms and Ammunition Regulation Act nga adunay silot nga prision mayor hangtod reclusion temporal.
Gidayeg ni Police Brigadier General Redrico A. Maranan, Regional Director sa PRO-7, ang kanunay nga paningkamot sa Bohol police sa pagkigbatok sa iligal nga drogas.
Source: PRO7-PIO
I via Renante Socia Lada