Usa ka dakong drug bust nga nagkantidad og ₱8.1 milyon ang gihimo sa mga awtoridad sa Tagbilaran City, Bohol, usa ka adlaw sa wala pa ang bisperas sa Pasko, sumala sa Police Regional Office 7 (PRO-7).
Sa ala 1:08 sa kaadlawon, Disyembre 23, 2024, ang Tagbilaran City Police Station ubos sa Bohol Police Provincial Office (BPPO) nagpahigayon og anti-drug operation sa Purok 7, Dangoy Street, Barangay Bool, Tagbilaran City.
Ani nga operasyon, nakumpiska ang 1.2 ka kilo sa ilegal nga drogas nga nagkantidad og ₱8,160,000. Gawas sa drogas, nakuha usab nga ebidensya ang daghang kantidad sa kwarta, usa ka cellphone, backpack, ug motorsiklo.
Naaresto usab ang usa ka 22-anyos nga suspek nga karon nag atubang sa kaso ilalom sa R.A. 9165 o Comprehensive Dangerous Drugs Act.
Matod ni PRO7 Officer-in-Command Police Brigadier General Roy Parena, ang maong operasyon naghatag og klaro nga mensahe nga ang PRO-7 dili magpasagad sa presensya sa ilegal nga droga sa mga komunidad.
“We are sending a strong message, PRO7 will not tolerate illegal drugs in our communities. Our dedicated team and law enforcement partners, working tirelessly 24/7, remain vigilant and proactive in our fight against drug-related crimes,” matod ni PBGen. Parena.
Ang mga nakumpiskar nga drogas gidala na sa Provincial Forensic Unit sa Tagbilaran City, para sa dugang imbestigasyon.
Source: PRO-7, PIO