Subling nasungkit sa Cagayan de Oro City Nutrition Council ang Consistent Regional Outstanding Winner in Nutrition (CROWN) Maintenance Award diin mismo si City Health Officer Dr Rachel Dilla ang mipresentar niini kang Mayor Rolando “Klarex” Uy ug sa mga sakop sa konseho atol sa sinemanang pagpakayab sa nasudnong bandila sa City Hall adlaw’ng Lunes, Abril 3, 2023.
Kini mao ang ikaduhang tuig nga nasakmit sa syudad ang CROWN Maintenance Award tungod sa maayong pagpatuman sa programa sa nutrisyon ilabina ang pagpalambo sa maayong panlawas sa kabataan ingon man mga mabdos ug kadtong nanginahanglan sa saktong giya sa nutrisyon.
Tungod niini dako ang kalipay ug garbo ni Mayor Rolando ‘Klarex’ Uy kinsa mao usab ang chairman sa City Nutrition Council sa maong pasidungog sanglit kini nagpakita nga matinud-anon ang dakbayan sa pagpatuman ug paghimo og mga programa sa maayong panglawas.
Nasayran nga lakip sa mitambong sa nasudnong pasidungog si City Councilor Maria Lourdes Gaane isip chairperson sa Committee on Health kauban ang City Nutrition Council didto sa kaulohan diin gidawat usab nila ang cash prize.
(Source: Cagayan de Oro City Information Office Facebook page)