Davao City – Dyes mil ka pesos nadawat nga cash assistance sa mukabat usa ka gatus ka mga vendors dinhi sa dakbayan sa Dabaw gikan sa kagamhanang lokal sa siyudad ug Department of Social Welfare and Development Office (DSWD) XI.
Sa milabay nga Biyernes, Setyembre 3, gitunol ang naasoy nga cash assistance ngadto sa mga vendors ilawom sa Livelihood Assistance Grant (LAG) pinaagi sa joint program sa kagamhanang dakbayan ug DSWD XI.
Mismong si DSWD XI Regional director Raquel Nunez ug City Social Welfare and Development Office (CSWDO) Head Atty. Marisa Gallo maoy nanguna sa pagtunol sa cash assistance.
Dako usab ang gibating kalipay sa mga vendors sa ilang nadawat nga ayuda nga dakong tabang sa ilang dugang kapital sa ilang gamay nga negosyo. Ang nasangpit nga mga vendors lakip sa 2,760 ka mga small business owners dinhi sa Davao City.
Una nang gipaniguro ni Davao City Mayor Sara Duterte nga matabangan ang mga anaa sa informal sector nga apektado sa Covid-19 pandemic ang panginabuhian.
(Source: Davao City Information Office)