Gilagdaan sa kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy pinaagi sa City Local Environment and Natural Resources Office (CLENRO), Del Monte Foundation Inc., Balubal Integrated Social Forestry Farmers Association (BISFA) , Balubal Barangay Council, Xavier University, ug San Isidro Calapacan Indahag Farmers Association – Multipurpose Cooperative (SIFICA-MC) ang Memorandum of Agreement ug Memorandum of Understanding alang sa pagpakusog sa pagtimbayayong sa pagprotehir sa kinaiyahan, Mayo 18 ning tuig.
Atol sa maong signing adlaw’ng Huwebes, Mayo 18, nagpasalamat si City Legal Officer Atty. Kenneth Tamala, kinsa mirepresenta ni Mayor ‘Klarex’ Uy, sa hugot nga suporta sa nasangpit nga mga ahensya, institusyon ug people’s organizations alang sa kalihokan sa pagprotektar sa kinaiyahan nga maoy usa sa gitutokan sa administrasyon ni Mayor Klarex.
Target sa nasangpit nga MOA ug MOU nga masustenir ang Agro-Forestry Nursery ug Farmers Training Center nga proyekto sa syudad diha sa barangay Balubal ug tree growing ug reforestation project.
Mitambong usab sa kalihokan si City Councilor Roger Abaday, chairman sa Committee on Environment sa konseho ning syudad, ug Barangay Balubal Chairperson Pablo Bactong.
(News and photo courtesy of CIO CDO)