Muabot sa 525 ka mga pasahero ang naserbisyohan ning bulan sa Mayo sa ‘Bayanihan Libreng Sakay’ ubos sa Volunteerism & Active Citizenship Program sa City Community Affairs Development sa kagamhanang lokal sa Cagayan de Oro.
Ang ‘Bayanihan Libreng Sakay’ usa ka hiniusang kalihokan ubos sa ‘Kanunay Nag-Alagad Volunteer Initiatives’ sa kagamhanan ning syudad.
Ang BLS nagtanyag og libreng sakay alang lamang sa mga estudyante, magtutudlo, persons with disabilities (PWDs) ug mga senior citizens.
Kini gipahigayon lamang matag adlaw’ng Biyernes sa mga piniling tunghaan.
Mapasalamaton usab ang syudad sa 153 ka mga riders, ingon man sa transport rider groups sama sa Dispatch, Pick Me Up, Fast Pick Up, Fetch Downtown ug sa Palangga ang Kabatan-onan – Libreng Sakay Program ug Cagayan de Oro City Police Office – Libreng Sakay Program sa aktibong pagsalmot sa maong katuyoan.
Ugmang adlawa, Hunyo 2 ang BLS anaa sa Indahag National High School, Hunyo 9 sa Balulang NHS, Hunyo 16 sa Macasandig NHS, Hunyo 23 sa Pagatpat NHS ug Hunyo 30 sa city hall.
(News and photo CIO CDO)