Human natalang dunay pag-ubos sa kaso sa nagpositibo sa CoVid-19 virus sulod sa lalawigan sa Misamis Oriental, ang Provincial Inter-Agency Task Force ubos sa pangpangulo ni Dr. Jerie P. Calingasan buot magpahigayon sa usa ka simultaneous massive vaccination.
Nunot na sa kamandaon ni Gobernador Bambi Emano nga dili angayang magkumpyansa ang tanan hilabina kinabuhi sa tawo ang at risk niini, gihingusgan pag-ayo sa tibuok pwersa sa PIATF ang pagpadayon sa vaccination roll-out sa matag lungsod ug dakbayan.
Atol sa senimanang pagpakayab sa nasudnong bandila niadtong Lunes gibutyag ni PIATF Chief Dr. Calingasan nga sa umaabot Oktubre 26 hangtud 27 mahitabo ang maong sunod-sunod nga massive vaccination.
Kini human malampuson siyang nakigpulong uban ang mga Chief of Hospitals ug tanang MHOs.
Matud ni Dr. Calingasan nga magsilbing pilot areas ang mga dakbayan sa El Salvador ug Gingoog kung asa pagatagaan prayoridad ang tanang economic frontliners nga mabakunahan ug Pfizer vaccine ang gamiton alang sa maong duha ka adlaw nga implementasyon.
Dako ang nakitang paglaom sa PIATF nga pamaagi sa maong massive vaccination magsilbing kining pultahan ngadto sa katumanan sa tinguha ni Gobernador Bambi nga hingpit nang mabuksan ang turismo sa lalawigan ning bulan sa Disyembre 2021.
“Ang priority nato niini mao ang economic frontliners. Hopefully we are looking forward already that the province of Misamis Oriental will economically open in December,” sulti ni Dr. Calingasan.
Isip usa ka preventive measure sa pagbatok sa makamatay nga sakit sa Corona virus, hilabihan ang preparasyon sa tanang frontliners alang sa kalampusan niini hilabina nga ang labing tumong sa tanang programa sa panglawas nga dili mahunong apan mas mouswag ang tanang Misamisnon bisan sa gisinating pandemya sa kasamtangan.
(Source: PIATF)
