Dul-an 60 ka persons with special needs gikan sa nagkadaiyang barangay ning syudad ang mipailawom sa mobile screening nga gipahigayon sa Tebow Cure Children’s Hospital, Mayo 12, diha sa City Tourism Hall.
Kini ang unang higayon nga gihimo sa maong ospital ang kalihokan dinhi sa siyudad, sumala pa ni Elvielhyn Fernandez, Patient Support Director sa Tebow Cure Children’s Hospital nga nahimutang sa Davao City.
Kada tuig, gatanyag ang maong hospital og libreng operasyon sa kapin 700 ka reconstructive plastic, orthopedic, ug pediatric general surgeries alang sa mga kabataan nga adunay disabilities sama sa clubfoot, cleft lip, palate ug uban pa.
Si City Councilor Girlie Balaba, ang chairperson sa Committee on Social Services kinsa maoy mirepresentar ni Mayor Klarex Uy, mipadayag sa iyang dakong pasalamat sa kadagkoan sa Tebow Cure Children’s Hospital sa paghatag og kahigayonan sa mga residente sa syudad nga makapahimulos sa ilang operasyon.
Nasayran nga mobiyahe padulong sa Davao City ang mapili nga mga aplikante aron didto operahan.
Ang kalihukan gipaluyohan sa City Social Welfare and Development Department pinaagi sa Community and Social Development Unit, Persons with Disabilities (PWD) section ug Persons with Disabilities Affairs Office.
(News and photo courtesy of CIO CDO)