Nagmalampuson ang regional partners review and assessment nga ubos sa proyekto sa World Vision nga gitawag og Protect Against Child Exploitation (Project ACE), bag-ohay lamang diha sa Chali Resort and Conference Center, Cugman, ning siyudad.
Atol sa maong kalihokan, gibalik lantaw sa World Vision ang mga kalampusan sa city level, barangay level ug regional level gumikan sa joint call to action statement nga gipahigayun pinaagi sa stakeholders’ forum niadtong Abril 27-28, 2022 sa De Luxe Hotel.
Kini gisalmotan sa mga representante gikan sa national government agencies, mga representante gikan sa nagkadaiyang buhatan sa LGU-CDO, City Council for the Protection of Children, mga representante gikan sa LGU- Quezon City, mga representante sa barangay Cugman, Puntod ug Gusa kinsa nahimong pilot areas sa Project ACE.
Mitambong usab si City Administrator Atty. Roy Hilario Raagas nga mirepresentar ni Mayor Rolando “Klarex” Uy.
Tumong sa maong kalihokan ang kanunay nga pagpakigbatok sa child labor ug online sexual exploitation tali sa mga kabataan.
Gawas sa review and assessment, mibisita usab ang mga partisipante gikan sa LGU Quezon City sa Oro Care Village, Maitum, Upper Puerto diin giatiman ang mga batang gibiyaan, batang gi-abusar, Children in Street Situations ug uban pa aron basihan sa pagkopya sa best practices.
Kahinumduman nga miduso og ordinansa sa tuig 2021 si Committee on Social Services Chairperson Hon. Joyleen Mercedes Balaba ug City Councilor Ian Mark Nacaya alang sa pagtimbayayong tali sa LGU-CDO ug World Vision Development Foundation sa tinguha nga ma-promote ang Project ACE.
(Source: Cagayan de Oro City Information Office Facebook page)