Malipayon ang mga musikero sa probinsya sa Misamis Oriental human ilang nadawat ang mga food packs pinaagi sa pagpaningkamot sa Misamis Oriental Provincial Band.
Natigayon ang pagpanghatag sa maong ayuda niadtong Miyerkules, Septiyembre 29, 2021 sa dakbayan sa El Salvador ug lungsod sa Initao, samtang niadtong Huwebes, Septiyembre 30 sa lungsod sa Talisayan ug Balingoan, ug nadawat sa mga musikero gikan sa lungsod sa Lugait, Initao ug Naawan ang maong tabang niadtong Lunes, Oktubre 4.
200 ka mga food packs nga adunay sulod nga unom (6) ka kilo nga bugas, lima (5) ka sachet sa Milo, unom (6) ka sachet nga kape, napulo (10) ka de-lata, ug margarine, ang natunol ngadto sa mga musikero nga nawad-an ug panginabuhian tungod sa nasinatiang pandemya.
Mapasalamaton ang mga benipisyaryo gikan sa maong mga lungsod sa wala damhang nadawat nga ayuda pinaagi sa Provincial Band.
Matod sa ulo sa buhatan sa Provincial Band nga si Mr. Glenn Cabagnot nga ang ilang inisyatibo sa pagtabang sa susama nila nga musikero nahatagan katumanan human sa ilang hangyo ngadto sa Department of Social Welfare and Development (DSWD).
Paagi usab kini sa ilang pasalamat kang Governor Bambi Emano nga bisan sa pandemya sila lamang nga mga musikero ang nahatagan og oportunidad nga makapadayon sa ilang panginabuhian pinaagi sa ilang talento.
Nabati sa mga personahe sa Kapitolyo Probinsyal ang pagpangga kanila ni Governor Bambi Emano hinungdan nga sila nagpadangat sab sa ilang tabang ug suporta ngadto sa mga nanginahanglan nga maoy ilang natun-an sa amahan sa lalawigan ngadto sa gialagarang katawhan. (Reymark Semaña)
(Source: PIO-MisOr |Â Rated E-CDO Facebook page)