Anaa na sa 48% ang ihap sa mga bata dinhi sa Cagayan de Oro nga nabakunahan kontra sa sakit nga tipdas, polio ug rubella.
Kini ang gibutyag ni Reagan Abbu, Health Education Promotion Officer lV sa City Health Office, nunot na sa nagpadayon nga ‘Measles, Rubella, Oral Polio Vaccine Supplemental Immunization Activity’ (MR OPV SIA) ning syudad.
Sa programang ‘Health Watch’ adlaw’ng Lunes, nasayran gikan ni Abbu nga subay sa datos sa CHO, anaa na sa 30,717 sa kinatibuk-ang ihap sa mga gagmay’ng kabataan ang nabakunahan batok tipdas, samtang anaa na usab sa 35,580 ang nabakunahan batok polio.
Sumala sa CHO, mokabat sa 73,382 ka mga bata ang target bakunahan sa tibuok dakbayan sa Cagayan de Oro sulod sa tibook bulan karong Mayo.
Magpadayon hangtud Mayo 31 ang supplemental vaccination sa mga kawani sa CHO ug mga vaccinators sa kabarangayan diha sa mga health centers ug pagbisita sa mga kabalayan sugod ala-6:00 sa sayong kabuntagon subay sa mandato sa Department of Health.
(News courtesy of CIO CDO. photo courtesy to CHIO)