General Santos City – Mi-ani og mga pagdayeg ang Allied Care Experts (ACE) Medical Center GenSan Inc. gikan sa City Council ning dakbayan sa GenSan human nila nadunggan gikan sa ilang President/CEO and Founder Dr. Fredilyn G. Samoro nga hatagan nila’g 10% nga diskwento ang mga pobreng pasyente nga ma-admit unya sa bag-o nilang Hospital nga mapalgan sa National Highway, Brgy. Lagao, General Santos City.
Una niini, gi-imbetahan ni GenSan City Councilor Edgar Acharon sa session sa Konseho ang mga opisyal sa ACE Medical Center-GenSan aron i-presenta o iyag-yag sa Sangguniang Panlungsod ang kasamtangang estado sa maong Balay Tambalanan ug sa mga umaabot nilang serbisyo alang sa ilang mga pasyente.
Matud ni Ms. Cora M. Caling (Special Asst. to the President) nga ang ACEMC-GenSan maoy pinakabag-o ug pinaka-modernong Hospital sa Gensan nga takdang mo-abli sa operasyon sa mosunod nga tuig 2024.
Sa panig usab ni Ms. Heidi Q. Ombao (Investor Relations Officer) gikanayon niini nga daghang mga serbisyo ang ila unyang itanyag nga wala sa ubang mga Hospital sa dakbayan gamit ang makabag-ong mga teknolohiya sa kahimanan ug pulos gayud Medical Doctor ang mga magdumala niini.
Dihang mi-abot ang ilang President/CEO and Founder nga si Dr. Fredilyn G. Samoro, siya usab ang gabutyag ug gapasalig sa 10% diskwento sa Hospital Bill sa tanang mga pobreng pasyente nga madala sa naasoy nga Balay Tambalanan.
Gipadayag kana sa maong Opisyal human gipangutana sa Konseho kung unsa ang ilang programa alang unya sa mga kabus nga pasyente nga gipalipay gayud sa kinatibuk-ang Konseho.
(Source: ACEMC GenSan)