Gipasalamatan ug gipahalipayan ni Mayor Rolando `Klarex’ Uy ang mga nagdumala ug miyembro sa Night Market Management Committee (NMMC) nga gipangulohan ni kanhi Kag. Enrico Salcedo tungod kay napadayon niini ang pagpahapsay sa mga dalan palibot sa Cogon Market ilabina ang J.R. Borja.
Matud ni Mayor Klarex nga siya mismo iyang natagamtaman ang kahapsay sa dalan ug palibot sa Cogon Market atol sa iyang pagsuroy ug pag-agi sa maong dapit kun ikumpara sa una niyang pagsuroy diin nagpatunga na sa dalan ang mga sidewalk vendors.
Gani, daling giaksyonan sa Roads and Traffic Administration (RTA) ang pipila ka mga vendors nga nibalik pagbaligya sa may J.R. Borja Extension human niya gipaabot kang RTA Dep’t Manager Engr. Nonito Oclarit ang sitwasyon inabagan sa kapulisan sa Cagayan de Oro City Police Office (Cocpo) Police Station 2.
Naglaum si Mayor Klarex nga magpadayon ang kahapsay sa dalan sa Cogon Market area aron ang Carmen Market na usab ang atimanon ug matutokan sa team sa mosunod nga mga adlaw.
(Source: CIO-Cagayan de Oro, photo courtesy by Reynan Baylin)