Cagayan De Oro City – Hugot nga gipatuman karon sa mga local officials ang striktong patakaran ilabi na sa pagpahigayon sa funeral gatherings, wakes ug birthday parties human ang mga health officials mibasol niini nga mga kalihokan nga maoy hinungdan sa kalit nga pagsaka sa COVID-19 cases nga naghatag hulga sa kahimtang sa main Covid-19 referral hospital sa Northern Mindanao. Dako ang kabalaka sa mga health officials nga ang kaso sa Covid cases sa bulan sa Mayo mas molabaw pa kaysa narecord sa Abril.
Ang hilabihang pagsaka sa kaso sa Covid nakapaluya sa trabaho sa state-run nga Northern Mindanao Medical Center (NMMC) dinhi sa Cagayan de Oro nga kinahanglan pa moatiman sa mga non-Covid 19 patients, matud pa ni Dr. Bernard Julius Rocha, ang liaison officer sa maong tambalanan.
Karong bag-o, nag-issue sa executive order si Mayor Oscar Moreno nga naglimit sa mga haya sa patay ngadto sa tulo (3) ka adlaw ug ang funeral crowds ngadto sa 20 ka tawo apil na ang religious ministers. Sa pikas bahin, apil mga police ug barangay officials ang gimanduan sa pagmonitor sa palibot aron sa pagdili sa pagpahigayon sa mga birthday gatherings ug uban pang home gatherings.
Ang mga restaurants usab ang gimaymayan sa paglimit gayod sa gidaghanon sa mga tawo nga motambong sa mga parties.
Gimando usab ni Mayor Moreno ang pag-usab sa curfew hours panahon sa weekend nga magsugod na sa alas 9pm ngadto sa 5am sa mosunod nga buntag.
Matud pa ni Dr. Rocha nga moabot sa kapin 100 ang kalit nga pag-increase sa mga pasyente sa Covid-19 pagadalhon sa NMMC hinungdan nga napugos ang maong hospital pagbukas sa dugang Covid-19 wards tungod sa maong kahimtang apil na ang pagdala sa City Hall sa dugang ventilators aron makaabag sa ekipo sa NMMC.
Sa gibutyag sa City Health Office moabot sa 644 ka mga bag-ong kaso ang natala gikan sa May 1 ngadto sa May 11 lamang , kulang sa 117 sa record nga 761 ka mga kaso sa tibuok bulan sa Abril, sumala pa ni Dr. Teodulfo Joselito Retuya Jr, city epidemiologist.  (Gin B. Serohijos, RPN DXKO CdO OIC City Information Office)