Gihan-ay na sa lokal nga kagamhanan sa Cagayan de Oro ang mga kalihukan sa umaabot nga kasaulogan sa ‘Higalaay Festival 2022’ sa bulan sa Agosto ubos sa pagpangulo sa City Tourism and Cultural Affairs Office (CTCAO).
Lakip sa mga kalihukan sa tinuig nga kapistahan sa syudad mao ang Carnival Street Dance Competition, Higalaay Street Parade and Floats, Miss Cagayan de Oro, Religious and Fluvial Procession, Mindanao Fashion Summit, Kahimunan Trade Fair, Kumbira, ug Oro Photographic Society Exhibit.
Masaksihan usab sa mga Kagay-anons ang Higalaay Agri Fair and Garden Show, Heritage Exhibit, Kagay-an Festival Fun Run, Dragon Boat Fiesta Race, ug Banda Oro 2022 diin pwede mosalmot ang nagkadaiyang grupo, lakip mga interesadong indibidwal.
Buksan ang usa ka bulan nga selebrasyon pinaagi sa Higalaay Festival 2022 Launching diha sa Centrio Ayala Mall karong umaabot Agosto 1, diin ipasundayag ang nagkalain-laing core activities sa kapistahan ni Sr. San Agustin, ang patron sa dakbayan.
(Source: SP | Cagayan de Oro City Information Office Facebook page)