Mokabat 12 ka mga illegal structures nga nakasulod sa road-right-of-way sa yuta nga gipanag-iya sa syudad diha sa Phase 3, Habitat for Humanity, Barangay Canitoan ang gikatakdang i-demolish sa Task Group Demolition karong Huwebes, Mayo 11, 2023.
Kini ang nauyonan atol sa pre-demolition conference, Lunes, Mayo 8, 2023, nga gidumala ni Engr. Luberth Arnol Paquino, chief sa Enforcement Division sa Office of the Building Official (OBO) isip representante ni TG Demolition chairman Atty. Jose Edgardo Uy ug gitambongan usab sa representante sa Barangay Canitoan.
Nasayran nga tulo na ka tuig nga gi-okupar sa maong mga residenti ang luna nga gitagana sa syudad nga open space ug dili angay tukuran og mga istruktura.
Gipasabot usab sa mga kadagkuan sa OBO nga gihatagan na og notice ang mga tag-iya sa illegal structures ug gipasabot sila sa ilang mga kalapasan.
Gibutyag ni Engr. Paquino nga daghan na ang mipaabot sa ilang reklamo sa buhatan ni Mayor Rolando `Klarex’ Uy batok sa maong mga illegal structures hinungdan nga gihangyo ni Mayor Klarex ang TG Demolition nga mohimo og aksyon.
(News and photo courtesy of CIO CDO)