Mipailawom sa lima ka hugna nga ‘Oro Barangay Tanod Basic Orientation’ ang kapin 500 ka mga barangay tanod ning dakbayan nga gilaumang matapos karong bulan sa Hunyo ning tuig.
Nasayran ubos sa RISE-CDO program ni Mayor Klarex Uy, gitutokan ang public order & safety sa syudad sanglit adunay dakong papel ang mga barangay tanod kinsa gi-isip nga ‘force multiplier’ sa kapolisan sa pagbantay sa kahusay ug kalinaw sa mga komunidad.
Gibutyag ni Mr. Christopher Precillas, tanod focal person sa Office for Community Affairs nga gipahigayon niadtong Abril 30 hangtod Mayo 2 ang unang batch sa training, samtang ang ikaduhang hugna sa Mayo 7-9, ikatulong hugna sa Mayo 14-16, Mayo 20-23 ang ika-upat nga hugna ug Mayo 27-29 usab ipahigayon ang ika-lima ug ulahing hugna.
Tuyo sa nasangpit nga training nga ma-professionalize ug ma-equip ang mga barangay tanod aron epektibong mapatuman ang ilang mga tahas ug responsibilidad diha sa kabarangayan.
Ang maong training hiniusang gipasiugdahan sa mayor’s office, Office for Community Affairs, uban sa hugot nga suporta sa Department of the Interior and Local Government – Cagayan de Oro, Cagayan de Oro City Police Office, barangay ug uban pang mga ahensya.
(News and photo courtesy of CIO CDO)
