Gipasabot sa City Health Office ning syudad nga angayan pa gihapon sundon ang pahimangno batok COVID 19 bisan pa man nga gideklara na sa World Health Organization (WHO) nga natapos na ang global public health emergency advisory.
Matud ni City Health Officer Dr. Rachel Dilla, angayan lamang sabton sa katawhan nga basi sa maong deklarasyon sa WHO, anaa pa gihapon ang hulga sa virus ug ang gitapos lamang ang health emergency sa rason nga aduna na kini solusyon nga dili na makahatag og grabeng simtomas nga moresulta sa kamatayon.
Matud ni Dr. Dilla nga nagpadayon ang pag-evolve sa COVID 19 virus apan tungod sa bakuna nga namugna, mas gipakusog niini ang immune system sa tawo batok sa maong virus ug malikayan ang grabeng epekto niini.
Subay niini, gihangyo usab ni Mayor Rolando “Klarex” Uy ang katawhan ilabina kadtong wala pa gayud magpabakuna ug magpa-booster shot nga mobisita lamang sa mga vaccination sites ning syudad aron mabakunahan.
(News and photo courtesy of CIO CDO)