Nanawagan karon si City Mayor Rolando “Klarex” Uy sa suspek sa kasong ‘hit-and-run’ nga nahitabo ning bag-o diha sa tulay sa Taguanao nga mo-surrender na sa mga otoridad aron dili mahimong komplikado ang iyang kaso.
“Unta ang maong hingtungdan, nailhan naman siya, mo-surrender na lang aron matagaan pod og kalinaw sa iyang kaugalingon. Sa dili madugay, makit-an ka ra man gyud. Gipadako pa nimo imong kaso, ang imong problema,” si Mayor Klarex nagkanayon atol sa iyang senemanang programa sa radyo nga ‘Inyong Alagad, Mayor Klarex Uy’.
Matud pa ni Major Julius Saluta, station commander sa Police Precinct 2, kasong murder ang isang-at sa buhatan sa City Prosecutors Office karong adlawa batok sa usa ka Stephen Neri, 27 anyos ug residente sa Muco, Zayas, Barangay Carmen tungod sa kamatayon sa 26 anyos nga si John Paul Levita niadtong Oktubre 9, 2022.
Sumala pa sa testimonya sa mga witnesses, gitudlo si Neri nga maoy drayber sa itom nga awto nga Hyundai Accent ug matud pa mibangga sa mga biktima sayo sa buntag niadtong Oktubre 9 sa Pelaez Bridge sa Taguanao, barangay Indahag ning syudad.
Ang maong insidente nahitabo human matud pa nagkagubot ang grupo sa mga batan-on samtang nag-inom sa maong tulay.
Gawas sa namatay, tulo ang naangol sa insidente nga sila si Rufus Levita, 22; Jhane Valerie Canonero, 18 ug residente sa Bacoor, Cavite; ug Prince B. Lopez, 19 anyos.
(Source: CIO-Cagayan de Oro)