Cagayan de Oro: Mayor Klarex mogahin og 2 ka adlaw kada semana aron makighimamat sa mga ordinaryong katawhan

0
0

Mogahin si Mayor Klarex Uy og duha ka adlaw matag semana aron pag-atubang ug pagtubag sa mga yangungo ug problema nga ipadangat sa mga ordinaryong katawhan sa dakbayan sa Cagayan de Oro.

Visit RPN DXKO Cagayan de Oro

Sa iyang mensahe atol sa flag-raising ceremony sa city hall Lunes sa buntag, gibutyag ni Mayor Klarex nga abli kanunay ang iyang buhatan alang ni bisan kinsa nga adunay tuyo kaniya.

Matag adlaw’ng Miyerkules ug Huwebes kada semana ang gigahin sa mayor nga makighinabi ug makighimamat sa mga katawhan sa dakbayan, sanglit mao kini ang palisiya sa iyang administrasyon nga mapaduol gayud ang batakang serbisyo sa syudad ngadto sa labing ubos sa katilingban.

Ang duha ka adlaw nga ‘People’s Days’ sa city hall gilaumang magsugod sunod semana.

Dugang ni Mayor Klarex lakip mga empleyado sa City Hall nga adunay katuyoan kaniya iyang abi-abihon sa maong mga adlaw.

Kahinumdoman nga una nang gipahibalo ni Acting City Administrator Atty. Roy Raagas nga mogahin usab og panahon si Mayor Klarex sa pagtambong sa mga flag raisings sa nagkalain-laing barangay ug mga buhatan sa syudad.

(Source: Cagayan de Oro City Information Office Facebook page)

LEAVE A REPLY

Please enter your comment!
Please enter your name here