Mahuman na sa dili madugay ang modernong Puerto Public Market nga kamulong gitrabaho ubos sa administrasyon ni Mayor Oscar Moreno inabagan sa mayoriya sa City Council pinangulohan ni Vice Mayor Raineir Joaquin Uy.
Gani, nakumpleto na ang first phase sa maong merkado ug sugdan na usab ang 2nd ug final phase human na-aprobahan ug na-released sa buhatan sa Bids and Awards Committee (BAC) ang supplemental budget nga balor sa ₱ 100 milyones.
Bag-ohay lang nga gihinabi ni Majority Floor Leader City Councilor Ian Mark Nacaya ang mokabat 200 ka mga vendors ug peddlers sa Puerto Market diin iyang gihatagan sa kinatibuk-ang hulagway sa duol na mahuman nga bag-o ug modernong Puerto Market.
Isip Overseer sa City Economic Enterprise Department (CEED), gihupay ni Kag. Nacaya ang kabalaka sa mga vendors ilabina kadtong mga karaan nga adunay puwesto nga basin dili na sila makabalik kung hingpit na nga mahuman ang maong merkado nga gikalipay pag-ayo sa mga vendors.
Alayon niini, gipasalamatan ni Kag. Nacaya si Mayor Moreno ug Vice Mayor Uy sa pagsuporta sa proyekto pinaagi sa pag-uyon sa supplemental budget aron matukod ang una nga modernong public market sa syudad.
(Source: CEED)