Personal nga mipadangat ang mga kadagkoan sa Bangko Sentral ng Pilipinas (BSP)-Cagayan de Oro City sa ilang imbitasyon ngadto kang Mayor Klarex Uy aron pagtambong sa usa ka Focus Group Discussion for Small Scale Miners (SSMs) nga ipahigayon karong umaabot Pebrero 6, 2023.
Matud pa sa BSP nga tumong sa kalihukan ang paghatag og kahigayonan sa mga SSMs dinhi sa Northern Mindanao nga mapalig-on ug mapalambo ang gold trading dinhi sa rehiyon.
Mamahimong dakong tabang usab ang maong kalihukan sa posibleng katukoran sa usa ka Gold Buying Station dinhi sa dakbayan sa Cagayan de Oro.
Samtang, gipaabot usab sa mga opisyal sa BSP ngadto kang Mayor Klarex Uy ang interes sa paglusad sa ‘Paleng-QR program’ nga gimugna sa BSP ug sa Department of the Interior and Local Government (DILG).
Katuyoan sa maong programa nga mapakusog ang ‘digital payments ecosystem’ sa nasud pinaagi sa ‘cashless payments’ diha sa mga pampublikong sakyanan ug kamerkadohan.
Tungod niini, malaumon si Mayor Klarex Uy nga makigtambayayong ang kagamhanang lokal sa dakbayan tali sa Bangko Sentral ng Pilipinas alang sa katumanan sa nahisgutang programa dinhi sa dakbayan.
(Source: CIO-CDO, photo courtesy by Jay Arancon)