Cagayan de Oro – DAKONG garbo sa siyudad human gipasidunggan si Mayor Klarex Uy isip ‘Most Outstanding Youth Champion in Davao Hub’ sa United States Agency for International Development (USAID) Opportunity 2.0 nga gipahigayon sa Quezon City, Nobyembre 13 ning tuig.
Mismo si Committee on Education Chairperson City Councilor Suzette Magtajas-Daba, Sangguniang Kabataan Federation President Kenneth John Sacala, City Administrator Atty. Roy Hilario Raagas, Oro Youth Development Officer Lord Saver Centina ug uban pang mga opisyal sa syudad ang midawat sa maong award.
Ang maong pasidungog nunot sa paghatag ni Mayor Klarex og wala’y puas nga suporta sa learning opportunities sa mga marginalized out-of-school youth ning siyudad pinaagi sa pagmugna sa Out-of-School Youth Development Alliance-Cagayan De Oro City (OSYDA-CDO) kon organisasyon nga gilangkoban sa public ug private organizations alang sa pagtubag sa mga kinahanglanon sa out-of-school youth (OSY).
Lakip sa flagship programs nga natukod pinaagi sa OSYDA-CDO ang KAHIGAYONAN Job Fair (2022-2024), kon career ug training fair for OSYs; HINABI Stakeholders Annual Summit, usa ka collaborative summit alang sa pag-improve sa education and technical training systems ug uban pa.
Gawas sa award ni Mayor Klarex Uy, gipasidunggan usab ang siyudad isip ‘Most Outstanding Program for O.S.Y. Employment’ pinaagi sa Job Placement Bureau – Public Employment Service Office (JPB-PESO), ‘Outstanding Program for OSY Entrepreneurship’, samtang midawat ang OSYDA-CDO og ‘Special Citation on Sustainability’ ug uban pa.
Gipasidunggan usab isip ‘Most Outstanding Youth Leader’ si Kagay-Anon Youth Network Alliance (KaYa NA!) President John Rey Remadavia.
Nasayrang gipasidunggan na si Mayor Klarex Uy sa USAID isip ‘Champion of Youth’ sa miaging tuig isip pagmatuod sa kanunay nga pagsuporta ni Mayor Klarex sa mga out-of-school youth.