Mibilib si Dr. Miguel Mantaring gikan sa Department of Health Central Office sa dakong bili nga gihatag ni Gobernador Bambi Emano sa programang panglawas sa probinsya alang sa katawhan.
Atol sa implementasyon sa Youth Support Group sa lungsod sa Claveria ning adlawng Martes, Marso 15, 2022, matod ni Dr. Mantaring kinsa maoy Medical Health Officer sa Mental Health Bureau sa DOH nga dili na sila kinahanglang pa nga mangusog sa pagduso sa mga health programs alang sa katawhan sa lalawigan gumikan kay usa kini sa mga prayoridad sa panggamhanan ubos sa liderato ni Gobernador Emano nga mahatagan og tukmang serbisyong panglawas ang mga Misamisnon.
Rason nga siya mapasalamaton ug gisiguro nga sila sa DOH andam nga motabang sa panginahanglan sa probinsya pinaagi sa paghatag og technical assistance alang sa implementasyon sa mga programa bahin sa maayong panglawas.
Usa ang Health sa gitutukan sa administrasyong Emano sulod sa siyam ka tuig nga pangatungdanan sa probinsya ug dayag nga makita ang kalambuan sa maong sektor karong panahona nga miserbisyo sa katawhan Misamis Oriental.
(Source: DOH 10 | Misamis Oriental Provincial Information Office Facebook page)
