Kultura sa mga Pilipinhon ang paghatag og lingaw ug kahayag matag bulan sa Disiyembre aron mabati ang diwa sa selebrasyon sa kapaskohan. Maoy rason nga ang matag kalungsuran ug siyudad sa lalawigan sa Misamis Oriental nagpahigayon og nagkalain-laing tema sa Christmas lighting aron ang ilang mga lumolupyo sa lungsod adunay masaksihan nga atraksyon ug mga dayan-dayan panahon sa kagabhion.
Gani, gisugdan na ang Christmas Lighting kon “Pasiga” sa nagkadaiyang munisipalidad ug siyudad sama na lamang sa Jasaan, Villanueva, Initao, Balingasag, Gingoog City, El Salvador City ug uban pa.
Kini usa ka timaan nga ang matag dapit adunay inisyatiba sa pagpaanindot pinaagi sa mga mabulokon nga mga dayan-dayan ug makadani nga mga suga uban sa tinguha nga mapromotar ang ilang dapit alang sa mga turistang lokal man o lumulupyo gawas sa probinsya.
Gani, ning bag-o lang gisugdan na usab ang Christmas Lighting sa Kapitolyo Probinsyal nga adunay tema nga “Salamat sa 9” kon diin nagpakita sa pagpasalamat sa tanang buhatan sa pagdumala ni Gobernador Bambi sulod sa siyam ka mga katuigan.
Abli sa katawhan ang Kapitolyo Probinsyal matag alas-6 ang takna sa gabie hangtud sa alas-onse aron masaksihan ang engrandeng mga suga nga susama kaanindot sa mga Amusement Park gawas sa nasud.
Dili ikalimod nga sa hinay-hinay nabati na sa mga Misamisnon balik ang espiritu sa kapaskuhan human giundangan ang mga pagpasiga og mga susama niini sa miaging tuig hatud sa pandemya.
Tungod sa paningkamot ni Provincial IATF Chief Dr. Jerie Calingasan ug Gobernador Bambi Emano nga makab-ot ang 70% herd immunity ug ang padayun nga pagkunhod sa kaso sa COVID-19, daghan sa mga Misamisnon ang nakabenepisyo ug nakahatag og higayon aron magkahiusa ang matag pamilyang Misamisnon ug makaselebrar sa kapaskuhan.
(Source:Rated E-CDO Facebook page)
